"Athens 2004"
Орчин үеийн олимпын хөдөлгөөний 100 жилийн ойд зориулсан олимп 1996 онд Афинд зохиогдох байсан ч грекчүүд өөртөө хэт бардаж, бэлтгэлээ тааруухан базаасны улмаас эрхээ Атлантад алдсан. Тэд энэхүү алдаандаа дүгнэлт хийж, шаргуу хөдөлмөрлөсөөр зуны XXVIII олимпыг хүлээн авахаар болжээ. Энэ эрхийн төлөө Ром, Кэйптаун, Стокхольм, Буэйнос Айрес хотууд өрсөлдсөн бөгөөд Афин шат бүрт илүү санал авсаар эрхээ баталгаажуулсан юм.
Грекчүүд 100 гаруй жилийн дараа эх нутагт нь эргэн ирсэн олимпыг нүүр улайхааргүй зохион байгуулахын тулд томоохон бүтээн байгуулалтыг эхлүүлэв. Тэд Сиднейн олимпоос бараг хоёр дахин их буюу 15 тэрбум ам.долларын зардал гаргажээ.
Гэхдээ бүх зардал зөвхөн олимпод зориулагдаагүй. Тэд энэ үйл явдлыг тохиолдуулан дэд бүтцийн нүсэр төсөл эхлүүлж, барилга байгууламж, зам, нисэх буудал, эмнэлэг, цахилгаан станц зэрэг олон шинэ бүтээн байгуулалт босгосон юм. Харамсалтай нь, тооцоогүй үрсэн энэ их мөнгө хожим асар их дарамт авчирсан. Тэд олимп зохиосноор ашиг олох нь байтугай их хэмжээний алдагдал хүлээжээ. Грек улсын санхүүгийн хямрал Афины олимпоос эхтэй гэдгийг мэргэжилтнүүд хүлээн зөвшөөрдөг.
“Афин-2004” нь оролцсон улс, спортын төрлийн тоогоороо бүх цаг үеийн дээд амжилтыг шинэчилсэн. Нийт 201 улс тамирчнаа илгээсэн бөгөөд Кирибати, Зүүн Тимор улс олимпын наадамд анх удаа оролцов. Тамирчид нийт 301 багц медалийн төлөө өрсөлдсөн нь өмнөх Сиднейн олимпоос нэгээр илүү байв. Олимпын тэмцээн, уралдааныг дэлхий даяар 3.9 тэрбум хүн цэнхэр дэлгэцээр үзсэн нь “Сидней-2000”-оос 300 саяар илүү байлаа. Эмэгтэйчүүдийн чөлөөт бөх олимпын хөтөлбөрт анх удаа багтжээ.
Грекчүүд нутгийнхаа дэвжээн дээр зургаан алт, нийт 16 медаль зүүж, 1896 оноос хойших хамгийн өндөр амжилтаа үзүүлсэн. Түүнчлэн тэр жил хөлбөмбөгийн шигшээ баг нь Европын аваргад анх удаа түрүүлсэн гээд 2004 онд грекчүүдэд дурсах зүйл ихтэй байлаа.
Медалийн хүснэгт
| № | Улс | Алт | Мөнгө | Хүрэл | Нийт |
| 1 | АНУ | 36 | 39 | 26 | 101 |
| 2 | БНХАУ | 32 | 17 | 14 | 83 |
| 3 | ОХУ | 28 | 26 | 36 | 90 |
| 4 | Австрали | 17 | 16 | 17 | 50 |
| 5 | Япон | 16 | 9 | 12 | 37 |
Монголчууд Афины олимпод
Монголчууд энэ олимпод спортын долоон төрөлд 20 тамирчны бүрэлдэхүүнтэй оролцож, нэг хүрэл медаль хүртэв. Жүдоч Х.Цагаанбаатар 60 кг-ын жинд хүрэл зүүж, Сиднейн олимпод тасраад байсан медалийн буухиаг үргэлжлүүлсэн түүхтэй.
| № | Нэр | Төрөл | Ангилал | Хүйс | Амжилт |
| 1 | Бат-Очирын Сэр-Од | Хөнгөн атлетик | марафон гүйлт (42.195 метр) | эрэгтэй | 75 |
| 2 | Лувсанлхүндэвийн Отгонбаяр | Хөнгөн атлетик | марафон гүйлт (42.195 метр) | эрэгтэй | 66 |
| 3 | Уранчимэгийн Мөнх-Эрдэнэ | Бокс | 60 кг | эрэгтэй | 9 |
| 4 | Хашбаатарын Цагаанбаатар | Жүдо | 60 кг | эрэгтэй | ХҮРЭЛ МЕДАЛЬ |
| 5 | Гантөмөрийн Дашдаваа | Жүдо | 66 кг | эрэгтэй | AC |
| 6 | Дамдины Сүлдбаяр | Жүдо | 73 кг | эрэгтэй | AC |
| 7 | Дамдинсүрэнгийн Нямхүү | Жүдо | 81 кг | эрэгтэй | AC |
| 8 | Цэнд-Аюушийн Очирбат | Жүдо | 90 кг | эрэгтэй | AC |
| 9 | Батжаргалын Одхүү | Жүдо | 100 кг | эрэгтэй | AC |
| 10 | Хишигбатын Эрдэнэт-Од | Жүдо | 57 кг | эрэгтэй | AC |
| 11 | Эрдэнэ-Очирын Долгормаа | Жүдо | 78 кг | эмэгтэй | AC |
| 12 | Отрядын Гүндэгмаа | Буудлага | 10 метрийн, агаарын хийн гар буу | эмэгтэй | 16 |
| 25 метрийн, спорт гар буу | 6 | ||||
| 13 | Андрейн Тамир | Усанд сэлэлт | 100 метрийн эрэгтэй чөлөөт сэлэлт | эрэгтэй | 64 |
| 14 | Намхайдоржийн Баярмаа | Хүндийн өргөлт | 58 кг | эмэгтэй | 14 |
| 15 | Баяраагийн Наранбаатар | Чөлөөт бөх | 55 кг | эрэгтэй | 12 |
| 16 | Оюунбилэгийн Пүрэвбаатар | Чөлөөт бөх | 60 кг | эрэгтэй | 13 |
| 17 | Түвшинтөрийн Энхтуяа | Чөлөөт бөх | 96 кг | эрэгтэй | 21 |
| 18 | Гэлэгжамцын Өсөхбаяр | Чөлөөт бөх | 120 кг | эрэгтэй | 12 |
| 19 | Цогтбазарын Энхжаргал | Чөлөөт бөх | 48 кг | эмэгтэй | 8 |
| 20 | Очирбатын Бурмаа | Чөлөөт бөх | 72 кг | эмэгтэй | 10 |
