НҮҮР ХУУДАС / Азийн өвлийн наадам

“Саппоро Обихиро 2017” Азийн өвлийн VIII наадам

Уг нь ээлжит наадам 2015 онд болох ёстой байсан ч Азийн олимпын зөвлөлийн хурлаар өвлийн наадмыг олимпын наадмаас нэг жилийн өмнө явуулж байх шийдвэрт хүрсэн юм. Ингэснээр зургаан жилийн дараа буюу 2017 онд Японы Саппоро, Обихиро хотуудад зохиогдов. Наадам зохион байгуулах хүсэлтээ энэ хоёр хот л илэрхийлсэн тул эрхийг тэдэнд шилжүүлсэн байна. 

Наадамд зориулж тамирчдын тосгон бариагүй тул тамирчид, албаны хүмүүс зочид буудлуудад байрлаж байв. Тэмцээн уралдааныг 13 газарт явуулсан бөгөөд заримыг нь 1972 оны Саппорогийн өвлийн олимпын үеэр ашиглаж байжээ. Тэшүүрийн ордноос бусад бүх байгууламж Саппород байрлаж байв. 

Тасалбарын дундаж үнэ 500 иен байсан хэдий ч борлуулалт хангалтгүй байв. Наадам эхлэхээс сарын өмнө гэхэд нийт тасалбарын ердөө 30 хувь нь зарагдаад байжээ. 

Наадамд 32 улс тамирчнаа илгээж, дээд амжилтыг дахин эвдлээ. Индонез, Шри Ланка, Зүүн Тимор, Туркменистан, Вьетнам улс өвлийн наадамд анхлан оролцлоо. Далайн орнуудын төлөөлөл Австрали, Шинэ Зеланд урилгаар оролцсон бөгөөд тамирчдынх нь амжилт албан ёсны дүн, бүртгэлд ороогүй юм.

Уг нь Бахрейн улс анх удаа хоккейн эрэгтэй багаа оролцуулахаар төлөвлөж байсан ч газрын тосны үнэ унасантай холбогдуулан тус улсын Засгийн газар тамирчдын зардлыг гаргахаас татгалзжээ. 

Өмнөх наадамд казахстанчуудын оруулсан бэнди болон цанын зүг чиг олох төрөл энэ удаа хөтөлбөрөөс хасагдав. Түүнчлэн дэд бүтэц хангалттай байхгүйн улмаас бобслей, чарга, скелетон, цанын хоёр төрөлт зэрэг өвлийн спортууд бас л наадмын гадна үлджээ. 

Багийн дүнгээр зохион байгуулагч Япон итгэлтэй өнгөлж, БНСУ, БНХАУ, Казахстан удаалав. Мөн БНАСАУ уран гулгалтын төрлөөр нэг хүрэл медаль хүртжээ. 

Манай улс тус наадамд Үндэсний шигшээ багийн захирал Ч.Насантогтохын удирдлага дор уулын цана, биатлон, гүйлтийн цана, фристайл, хоккей, шорт-трек, тэшүүрийн төрөлд 42 тамирчны бүрэлдэхүүнтэй оролцсон ч хараахан медаль авч чадсангүй.

Медаль авсан орнууд