"Lausanne 2020" Залуучуудын өвлийн III олимп
Өвлийн III олимпыг зохион байгуулах хүсэлтэйгээ дөрвөн хот илэрхийлсэн ч Лейк-Плэсид явцын дунд саналаа татаж, Софи хот ОУОХ-ны шалгуурт тэнцээгүй тул Швейцарын Лозанн, Румыний Брасов хотууд өрсөлдөв. 2015 онд Каула Лумпурт болсон ОУОХ-ны чуулганаар санал хураалт явуулахад Лозанн 71:10-аар илт давуу ялжээ.
Лозаннд 79 орны 1788 тамирчин өрсөлдөхөөр очсон нь залуучуудын өвлийн олимпын шинэ дээд амжилт болов. Албани, Азербайжан, Эквадор, Хаити, Хонконг, Косово, Пакистан, Катар, Сингапур, Тайланд, Тринидад ба Тобаго, Туркменистан гэсэн 12 улс залуучуудын өвлийн олимпод анхлан оролцлоо. Өмнө нь өвлийн олимпод огт оролцож үзээгүй Катар, Туркменистан улс цас мөсний тэмцээнтэй анхлан танилцсан байна.
Цанатай уулын авиралт, эмэгтэйчүүдийн цанын хоёр төрөлт олимпын хөтөлбөрт анх удаа багтав. Мөн 3х3 хоккейн холимог багийн тэмцээнийг зохион байгуулсан нь гоол арвин, өрсөлдөөн ихтэй, сонирхолтой болсон юм.
Багийн дүнгээр ОХУ тэргүүлж, зохион байгуулагч Швейцар удаалав. Хоёр улсын алтан медалийн тоо тэнцэж, мөнгөн медаль илүү авснаараа оросууд дээр нь бичигдсэн. Түүнчлэн холимог багийн тамирчид 18 медальтайгаар Шведийн хамтаар дөрөвдүгээр байрыг хуваан эзэлжээ.
Медаль авсан орнууд
№ | Улс | Алт | Мөнгө | Хүрэл | Нийт |
| 1 | ОХУ | 10 | 11 | 8 | 29 |
| 2 | Швейцар | 10 | 6 | 8 | 24 |
| 3 | Япон | 9 | 7 | 1 | 17 |
| Холимог баг | 6 | 6 | 6 | 18 | |
| 4 | Швед | 6 | 4 | 7 | 17 |
| 5 | Австри | 6 | 2 | 5 | 13 |
Монголчууд Лозанны олимпод
Монголчууд энэ удаагийн олимпод гүйлтийн цана, биатлоны төрөлд зургаан тамирчинтай оролцлоо.
Цанын хөвгүүдийн спринт төрөлд Б.Хонгор 72, О.Золбаяр 60-р байр эзэлсэн бол охидын уралдаанд Д.Урангоо 69, Б.Номин-Эрдэнэ 57-р байр эзлэв.
Түүнчлэн биатлонч охин Ч.Бямбасүрэн спринт уралдаанд 83, хувийн гараанд 87-р байр эзэлсэн. Харин Э.Энхсайхан хөвгүүдийн спринтэд 49, хувийн гараанд 12-р байрт орсон юм. 12.5 км-ийн хувийн гараанд 99 тамирчин хурд сориход Э.Энхсайхан дөрвөн сум алдаж буудан тэргүүлэгчээс 2:41 минут хоцорсон үзүүлэлтээр 12-т орсон нь Монголын биатлончдын хувьд том амжилт байлаа.
Монгол тамирчдын амжилт
| № | Нэрс | Хүйс | Төрөл | Ангилал | Амжилт |
| 1 | Энхбатын Энхсайхан | эрэгтэй | биатлон | 7.5 км спринт | 49-р байр |
| 12.5 км | 12-р байр | ||||
| 2 | Чулуунбатын Бямбасүрэн | эмэгтэй | биатлон | 6.0 км спринт | 83-р байр |
| 10 км | 87-р байр | ||||
| 3 | Дуламсүрэнгийн Урангоо | эмэгтэй | цана | спринт | 67-р байр 3:27.22 |
| 5 км гүйлтийн цана | DNF | ||||
| кросс | 69-р байр 6:26.51 | ||||
| 4 | Барснямын Номин-Эрдэнэ | эмэгтэй | цана | спринт | 60-р байр 3:18.09 |
| 5 км гүйлтийн цана | 61-р байр 18:08.7 | ||||
| кросс | 57-р байр 5:58.79 | ||||
| 5 | Отгонлхагвын Золбаяр | эрэгтэй | цана | 10 км гүйлтийн цана | 38-р байр 30:03.7 |
| спринт | 61-р байр 3:44.37 | ||||
| кросс | 60-р байр 4:58.58 | ||||
| 6 | Батсүхийн Хонгор | эрэгтэй | цана | 10 км гүйлтийн цана | 61-р байр |
| спринт | 74-р байр 4:02.06 | ||||
| кросс | 72-р байр 5:14.85 |
