ОЛИМПИЙН НААДМЫН ХАМГИЙН ЗАЛУУ ОРОЛЦОГЧ
“Токио-2020” зуны олимпийн XXXII наадмын нээлтийн ажиллагаа эхлэхэд хоёр хоног, анхны медалийн эзэд тодроход гурав хоног дутуу байгаа ч энэ олимпийн эгэлгүй баатруудын нэр аль хэдийнээ цуурайтаад байна.
Тэдний нэг бол “Токио -2020” олимпийн наадмын хамгийн залуу (нялх гэвэл илүү тохирмоор) тамирчин Хенд Заза.
Ердөө 12 настай Сири улсын тамирчин Заза ширээний теннисний төрлөөр олимпод оролцох эрхээ өнгөрөгч оны хоёрдугаар сард Йорданд болсон тэмцээнд түрүүлж авсан билээ. Дэлхийн чансааны 155 дугаарт бичигддэг Заза охин таван настайгаасаа эхлэн өөрийн ах Обайдагасаа үлгэрлэн ширээний теннисээр хичээллэж эхэлжээ.
БНХАУ-ын одон бөмбөгийн од, олимпийн гурав, дэлхийн найман алтан медальт Дин Нинг бишэрч, хүндэтгэдэг Заза охин “Токио-2020” олимпод оролцож туршлага хуримтлуулаад, 2024 онд Парист болох олимпод харин медалийн төлөө өрсөлдөх зорилготой байгаа гэнэ.
Олимпийн түүхэнд Зазагаас ч “залуудаа” олимпод оролцсон хоёр ч тамирчин бий. “Гренобль-1968” өвлийн олимпод Румыний уран гулгагч охин Беатрисе Хустью 11 настайдаа оролцож байсан бол орчин цагийн анхны олимп болох “Афин -1896”-д Грекийн Димитриус Лоундрас хэмээх 10 настай гимнастикч хүү оролцсон, оролцоод зогсохгүй суга савлуурын багийн төрөлд хүрэл медаль хүртэж байсан түүхтэй.
“Таван цагариг” сонины тусгай сурвалжлагч Ц.Энхтүвшин Токиогоос мэдээлж байна.
